Trascrizione

Ludovicus Johannes miseratione divina tituli sanctorum Quattuor coronatorum Sancte Romane Ecclesie presbiter cardinalis Segobricensis in civitate Bononia eiusque comitatu territorio et districtu Exarchatuque Ravenatis ac provincia Romandiole et autem Apostolice Sedis legatus ac vicarius in temporalibus et spiritualibus et temporalibus generalis dilectissimo nobis domino Galeacio Marescotto de Calvis equiti salutem et gratiam nostram.
Supplicato nobis parte tui in nostri absentia et nobis existentibus in partibus Curie Romane dominos Sexdecim Reformatores status civitatis Bononie de mense octobris anni MCCCCLVI tibi donasse propter damna et dispendia per te passa et considerata tui sollertia tam ad statum Sancte Romane Ecclesie quam ad presentem statum pro te et tuis heredibus omnia iura in possessionibus olim illorum de Confortis positis in curiis et locis Crespelani, Unzole et Confortini comitatus Bononie et que possessiones postea pervenerunt ad illos de Ghisileriis cum omnibus pertinentiis suis et hodie spectant quomodolibet ad Cameram Comunis vigore confiscationis bonorum dictorum de Ghisileriis propter eorum rebellionem et hoc absque preiudicio alicuius tertii cum condictione quod tu non deberes capere possessionem dictorum bonorum nisi prius per spectabiles viros Dionisium de Castello, Johannem de Guidottis et Nicolosium de Poetis omnes de numero dominorum Sexdecim fuerit declaratum an ipsa bona sint Camere vel ne ut in dicta donatione latius continetur rogata per Albertum Parisium notarium Bononie et cancellarium dictorum dominorum Sexdecim et considerato quod infra tantum tempus a tempore dicte donationis usque ad datum supplicationis dicti Dionisius, Johannes et Nicolosius nil super predictis declaraverunt et cesserunt plures et diversi menses infra quos per eos nihil declaratum fuit, nos cupientes rem hanc maturius intelligere et an ipsa bona essent Camere vel ne, commisimus eximio doctori B. Castilionis auditori nostro et nostro locumtenenti in civitate Bononia ut audiret cognosceret et referret et visa relatione nobis facta per dictum nostrum commissarium et locumtenentem cuius quidem relationis tenor sequitur in hac forma videlicet:
Refert vobis reverendissime domine devotus servitor ac locumtenens eiusdem B. Castilionis se de suprascriptis plenissime informasse et repperisse bona huic supplicationi colligata non fuisse nec esse Floriani et Johannis pupillorum filiorum et heredum quondam Johannis Matthei Minotti vigore alicuius sententie in favorem eorum late super bonis illorum de Confortis et que postea pervenerunt ad illos de Ghisileriis sed illa fuisse et esse Camere Bononie tamquam bona habita et possessa per illos de Ghisileriis nunc confiscata, ex quibus bonis Camera Bononie nil in presentiarum utilitas habet, licet detineantur et occupentur indebite et iniuste per dictum Florianum sub colore sententie in favorem suum et eius fratris late in bonis illorum de Confortis postea perventis ad illos de Ghisileriis et demum ad Cameram Bononie; ex quo videtur eidem B. locumtenenti quod vestra reverendissima dominus potest facere gratiam et supradicto domino Galeacio et cuiusque sibi videbitur tamquam de bonis Camere que nullam utilitatem nunc consequitur. Provideat tamen vestra reverendissima dominus sicut ei sibi videbitur cui me humiliter trado atque commendo.
Datum Bononie die vigesimoquinto iunii anni MCCCCLVII.
Bona de quibus supra fit mentio sunt infrascripta videlicet: primo unum cassarum cum una turri et duodecim tornaturis terre aratorie vel circa positum et posite in guardia Unzole in loco dicto Confortim iuxta viam publicam de subtus, iuxta olim dominum Carolum de Saliceto militem et hodie eius heredes et successores eius loco a duobus lateribus et iuxta Martignonum ab occidente. Item una petia terre prative buschive et vallive tornaturarum vigintiduarum vel circa posita in guardia Unzole in loco dicto El pra de la valle alias El pra dal ponton iuxta Martignonum ab oriente, iuxta viam publicam desuper, iuxta Gulielmum de Confortis et iuxta Fossesellam. Item unum cassarum cum duabus tornaturis terre vel circa positum in guardia Unzole iuxta fossa de super, iuxta viam publicam a duobus lateribus et iuxta Gulielmum de Confortis ab occidente. Item una petia terre aratorie et arborate decem et octo tornaturarum vel circa posita in guardia Crespelani in loco dicto al Campo da la fontana iuxta Paulum Berti de Mutina desuper, iuxta Fossesellam ab occidente, iuxta viam publicam ab oriente et iuxta fossam dicti casamenti seu cassari desubtus. Item una petia terre aratorie tornaturarum duodecim vel circa posita in curia Unzole in loco dicto la Croxe iuxta Fossesellam desuper, iuxta ser Philippum de Brunis ab occidente et iuxta viam publicam a duobus lateribus. Item una petia terre prative et buschive tornaturarum quadraginta vel circa posita in guardia Unzole iuxta Gulielmum de Confortis a tribus lateribus et iuxta viam publicam de subtus. Item una petia terre aratorie tornaturarum septem vel circa posita in guardia Unzole subtus stratam qua itur ad Castrum Franchum iuxta viam publicam desuper et iuxta Anthonium de Albinea a tribus lateribus. Item una petia terre buschive duarum tornaturarum vel circa posita in guardia Crespelani in loco dicto Rastioro iuxta Petrum ser Betti a tribus lateribus et iuxta bona plebis de Montebellio.
Nos quidem qui semper intenti sumus ad omnia commoda utilitates et honores vestros et vestra utpote eius quem movimus affectum esse ad statum Sancte Romane Ecclesie Sanctissimi domini nostri ac nostrum et presentem statum pro cuius conservatione multos labores multasque pericula et damna per te et spectabilem patrem tuum Ludovicum Marescottum de Calvis doctorem subiisse hoc tempore constat rem vobis gratam ac utilem facere volentes, considerantes quod de anno MCCCCLV et de mense decembris dicti anni cum presentia consensu et voluntate dominorum Sexdecim tunc vobis donavimus quoddam casamentum castri Confortini positum in guardia Unzole iuxta canale seu fossam Martignoni cum una turri murachiis et fundamentis fossamque cum circula exteriori ac quondam aream sive terreno duarum tornaturarum cum aliis in littera dicte donationis contentis datam Bononie sub die quinto decembris dicti anni MCCCCLV signatus Manuel Guarinus et Albertus Parisius latius continetur, tenore presentium auctoritate nostra legationis officii et omni alio meliori modo iure via forma et causa quibus magis et melius possumus et valemus motu proprio et ex certa scientia cum consensu tamen et voluntate dictorum dominorum Sexdecim Reformatorum status civitatis Bononie dictam primam donationem confirmantes modis et condictionibus in dictis litteris contentis dictam donationem per dictos dominos Sexdecim vobis factam de mense octobris proxime elapso dicti anni MCCCCLVI rogatam per dictum Albertum Parisium pro vobis et dicto Ludovico patre vestro vestrisque heredibus et successoribus in perpetuum confirmamus et ad maiorem cautellam omnia suprascripta bona in dicta relatione contenta et generaliter omnia alia et quecumque bona et iura in dictis terris locis et villis Crespelani Unzole et Confortini que fuerunt olim illorum de Confortis et postea perventa ad illos de Ghisileriis nunc rebellibus et ad dictam Cameram confiscata et devoluta a quocumque indebite et iniuste occupata et detenta sub quibuscumque confinibus posita et situata tibi Galeacio pro te et dicto tuo patre vestrisque heredibus et successoribus pleno iure et in perpetuum damus tradimus concedimus atque donamus pure mere simpliciter et irrevocabiliter ut ammodo et in antea vestre intelligatur fuisse et esse a tempore dicte rebellionis illorum de Ghisileriis citra ad habendum tenendum et possidendum et quicquid vobis donatariis vestrisque heredibus et successoribus perpetuo placuerit faciendum de omnibus et singulis rebus supra donatis intra suos confines vel alios si plures aut veriores apparerent cum suis accessibus et eggressibus (sic) usque ad vias publicas et cum omnibus et singulis que dictis rebus donatis coherent et insunt aut coherere et inesse possunt de iure consuetudine vel de facto, quorum omnium commodum et utilitas ad vos donatarios vestrosque heredes et successores pleno iure perpetuo spectet atque pertineat. Que bona et iura cum omnibus ut supra ad Cameram spectantibus et generaliter cum omnibus aliis ut supra volumus ut vos heredesque et successores vestri habeatis teneatis et possideatis tamquam res vestras illisque utamini fruamini et gaudeatis tamquam de rebus et bonis vestris dantes ex nunc vobis liberam licentiam et potestatem reformandi dictum castrum Confortini ut prius erat et reedificandi et reaptandi modo vestro absque alicuius contradictione vel molestia, constituentes ex nunc vos dominos Ludovicum et Galeacium donatarios predictos vestrosque heredes et successores in dictis bonis et iuribus in nostrum et Camere Bononie locum, trasferrentesque in vos et vestros heredes et successores vestris nobis et Camere predicte competens et competiturum etiam contra quoscumquequi dicta bona et iura a tempore rebellionis dictorum de Ghisileriis citra indebite et iniuste detinuerunt et occupaverunt concedentesque insuper vobis dominis Ludovico et Galeacio antedictis quod auctoritate propria per vos vel alium vestro nomine quandocumque vobis placuerit tenutam et corporalem possessionem dictorum bonorum et iurium capere et apprehendere possitis illaque tenere et possidere et de eis facere et disponere prout vobis videbitur et placuerit mandantes ex [...] domino Thesaurario Camere Bononie nec non dominis defensoribus haveris et iurium Camere antedicte aliisque omnibus ad quos spectat et quomodolibet spectare posset quatenus presens nostrum donationis decretum observent faciantque firmiter ac inviolabiliter observare vos prenominatos dominos Ludovicum et Galeatium seu omnem alium vestrum legiptimum procuratorem vel nuntium in corporalem possessionem et tenutam omnium dictorum bonorum ponant et inducant positosque manuteneant et conservent, non obstantibus quod dicti Dionisius Johanes (sic) de Guidottis et Nicolosius Poeta non declaraverint dicta bona esse Camere et maxime cum declaratum fuerit per nostrum commissarium et locumtenentem illa fuisse et esse Camere, non obstante etiam aliqua prohibitione per ordinamenta Bononie facta quod non possint construi aliqua fortilitia de novo in comitatu Bononie absque licentia Regiminum, non obstantibus etiam statuto Bononie sub rubrica de donationibus disponente quod in donatione excedente summam centum librarum requiratur insinuatio interventio alterius ex iudicibus domini potestatis Bononie duo notarii et certum limitatum numerum testium, non obstantibus etiam quibuscumque ordinibus et quibuscumque constitutionibus apostolicis que ipsam donationem impedire haberent ceterisque ordinibus constitutionibus et aliis quibuscumque quomodolibet in contrarium facientibus non obstantibus. Quibus omnibus quantum ad hec solum ex certa scientia auctoritate predicta qua fungimur ut supra derogamus et derogatum esse volumus et mandamus supplentesque omnes defectus solemnitatum predictarum et cuiuslibet alterius que in predictis intervenire debuissent. In quorum fidem testimonium et robur presens decretum fieri iussimus et nostri consueti magni sigilli impressione muniri.
Datum Crespelani comitatus Bononie in domo nostre consuete ressidentie quam ibi nunc facimus propter casum morbi vigentis in Bononia die primo iulii anni millesimi quadringentesimi quinquagesimi septimi tempore pontificatus sanctissimi in Christo patris et domini nostri domini Calisti divina providentia pape tertii anno tertio.

Suprascriptum donationis decretum in omnibus et per omnia prout in eo continetur processit de voluntate magnificorum dominorum Sedecim Reformatorum status libertatis civitatis Bononie ac per eos approbatum et confirmatum fuit dum modo sit absque preiudicio tertii salvoque quod in parte reedificationis castri Confortini cui adhuc non consenserunt.
Datum ut supra.
A. Parisius cancellarius mandato subscripsi.

Suprascriptum donationis decretum postea videlicet die vigesimoseptimo mensis presenti augusti confirmatum est et approbatum fuit per magnificos dominos Sedecim ut supra continetur.
A. Parisius cancellarius mandato subscripsi.

P. Pastoris

(sul retro) Presens decretum donacionis et confirmacionis registratum fuit in campione daciorum et gabelarum civitatis Bononie ad fol. 343 per me Batistam quondam Castelani de Castelanis notarium potestatis et nunc notarium dictorum dominorum defensorum.